[125] อตีตารมฺมณํ อรณํ ธมฺมํ ปฏิจฺจ อตีตารมฺมโณ อรโณ ธมฺโม อุปฺปชฺชติ เหตุปจฺจยาฯ (1)

อนาคตารมฺมณํ อรณํ ธมฺมํ ปฏิจฺจ อนาคตารมฺมโณ อรโณ ธมฺโม อุปฺปชฺชติ เหตุปจฺจยาฯ (1)

ปจฺจุปฺปนฺนารมฺมณํ อรณํ ธมฺมํ ปฏิจฺจ ปจฺจุปฺปนฺนารมฺมโณ อรโณ ธมฺโม อุปฺปชฺชติ เหตุปจฺจยาฯ (1) (สํขิตฺตํฯ)

เหตุยา ตีณิ…เป.… อวิคเต ตีณิ (สํขิตฺตํ)ฯ

(สหชาตวารมฺปิ…เป.… สมฺปยุตฺตวารมฺปิ ปฏิจฺจวารสทิสํฯ)

[126] อตีตารมฺมโณ อรโณ ธมฺโม อตีตารมฺมณสฺส อรณสฺส ธมฺมสฺส เหตุปจฺจเยน ปจฺจโยฯ (1)

อนาคตารมฺมโณ อรโณ ธมฺโม อนาคตารมฺมณสฺส อรณสฺส ธมฺมสฺส เหตุปจฺจเยน ปจฺจโยฯ (1)

ปจฺจุปฺปนฺนารมฺมโณ อรโณ ธมฺโม ปจฺจุปฺปนฺนารมฺมณสฺส อรณสฺส ธมฺมสฺส เหตุปจฺจเยน ปจฺจโยฯ (1)

อตีตารมฺมโณ อรโณ ธมฺโม อตีตารมฺมณสฺส อรณสฺส ธมฺมสฺส อารมฺมณปจฺจเยน ปจฺจโยฯ (สํขิตฺตํฯ)

[127] เหตุยา ตีณิ, อารมฺมเณ นว…เป.… อวิคเต ตีณิ (สํขิตฺตํฯ ยถา กุสลตฺติเก ปญฺหาวารํ, เอวํ วิตฺถาเรตพฺพํ)ฯ

20-100. อชฺฌตฺตตฺติก-สรณทุกํ

1-7. ปฏิจฺจวาราทิ

เหตุปจฺจโย

[128] อชฺฌตฺตํ สรณํ ธมฺมํ ปฏิจฺจ อชฺฌตฺโต สรโณ ธมฺโม อุปฺปชฺชติ เหตุปจฺจยาฯ